Sifa zote njema zinamstahiki Allah (Subhanahu wa Ta'ala), Mola Mlezi wa viumbe vyote, aliyefanya baadhi ya nyakati kuwa na ubora kuliko nyingine. Swala na salamu zimfikie Kipenzi chetu na Mtume wa mwisho, Muhammad (Swallah Llahu 'alayhi wa sallam), maswahaba zake waongofu, na kila anayefuata nyayo zao kwa wema mpaka Siku ya Malipo.
Katika mzunguko wa wiki, Allah ametujalia siku maalum ambayo ameidhinisha kuwa ni "Bwana wa Siku" (Sayyidul Ayyaam). Siku hii si nyingine bali ni Siku ya Ijumaa. Kwa muumini wa kweli, Ijumaa si siku ya kawaida ya mapumziko au mwisho wa wiki, bali ni kituo kicker wa kiroho kinachofuta madambi ya wiki nzima na kuongeza viwango vya imani. Katika makala hii, tutachambua kwa kina fadhila kuu za siku hii pamoja na hukumu na adabu za kisheria zinazomuhusu kila Muislamu.
Fadhila Za Siku Ya Ijumaa
Mtume (Swallah Llahu 'alayhi wa sallam) ametubainishia utofauti na utukufu mkubwa wa siku hii kupitia hadithi mbalimbali zilizo sahihi. Miongoni mwa fadhila hizo ni:
1. Siku Bora Zaidi Kuliko Zote
Mtume (Swallah Llahu 'alayhi wa sallam) amesema: "Siku bora kabisa ambayo jua limeichomozea ni siku ya Ijumaa. Ndani yake aliumbwa Adam, na ndani yake aliingizwa Peponi, na ndani yake alitolewa humo, na Qiyama hakitasimama ila katika siku ya Ijumaa." (Mapokezi ya Muslim).
2. Ina Saa Ambayo Dua Haikataliwi (Saa ya Ijabu)
Kuna muda maalum katika siku ya Ijumaa amapo mja akiomba jambo lolote la kheri basi Allah humpa. Mtume amesema kuwa muda huo ni mchache, na wanachuoni wengi wameenda kwenye kauli kuwa saa hiyo inapatikana baada ya Swala ya Alaasiri hadi kuzama kwa jua. Huu ni muda wa dhahabu wa kukaa msikitini au kwenye mswala na kuomba haja zako.
3. Kafara ya Madambi ya Wiki Nzima
Kuhudhuria Swala ya Ijumaa kwa kuzingatia adabu zake ni sababu ya kusafishwa madambi madogo yaliyofanyika kati ya Ijumaa hiyo na Ijumaa iliyopita, kama ilivyothibiti katika hadithi sahihi kuwa Swala tano na Ijumaa hadi Ijumaa ni kafara ya yaliyo kati yake iwapo madambi makubwa yataepukwa.
4. Kinga Dhidi ya Fitna ya Kaburi
Muislamu yeyote anayefariki usiku wa Ijumaa au mchana wake, Allah humkinga na mtihani na fitna za kaburini. Hii ni alama ya mwisho mwema (Husnul Khaatima) kwa mja.
Hukumu Za Kisheria Kuhusu Swala Ya Ijumaa
Swala ya Ijumaa ina hukumu na misingi yake thabiti katika sheria ya Kiislamu ambayo kila mwanafunzi na muumini anapaswa kuijua:
- Hukumu ya Kuswali: Ni Faradhi ya Ain (Wajibu wa lazima kwa kila mtu binafsi) kwa kila mwanamume Muislamu, aliyebalehe, mwenye akili timamu, aliye mkazi (si msafiri), na mwenye afya (asiye na udhuru wa ugonjwa).
- Onyo Kali kwa Anayeacha: Mtume (Swallah Llahu 'alayhi wa sallam) ametoa onyo kali kwa wale wanaopuuza Swala hii kwa kusema: "Watu waache kuacha Swala za Ijumaa, au sivyo Allah atapiga chapa juu ya nyoyo zao kisha watakuwa miongoni mwa walioghafilika." (Mapokezi ya Muslim).
- Waliosamehewa Kuhudhuria: Wanawake, watoto wadogo, wagonjwa wasioweza kufika msikitini, na wasafiri hawajibiki kuswali Ijumaa; wao wataswali Swala ya Adhuhuri ya kawaida raka nne (ingawa mwanamke akihudhuria msikitini na kuswali Ijumaa, inamfalia na hahitaji kuswali Adhuhuri).
Sunnah Na Adabu Za Siku Ya Ijumaa
Ili kupata ujira kamili uliotajwa na Allah na Mtume Wake, mwanafunzi na muumini anashauriwa kutekeleza mambo yafuatayo kabla na wakati wa Ijumaa:
- Kukoga (Ghuslul Jumu'ah): Ni sunnah iliyokokotezwa sana (na baadhi ya wanachuoni wameona ni wajibu) kukoga mwili mzima kabla ya kwenda msikitini kwa nia ya kusafisha mwili.
- Kujipamba na Kusafisha Kinywa: Kutumia mswaki (Sawak) kusafisha kinywa, kuvaa nguo zilizo safi kabisa (ikiwemo nyeupe ambayo inapendekezwa zaidi), na kujipaka mafuta mazuri ya manukato (kwa wanaume pekee).
- Wahi Kwenda Msikitini: Kwenda mapema msikitini huleta thawabu kubwa sana. Aliyewahi saa ya kwanza ni kama aliyetoa dhabihu ya ngamia, anayefuata ni kama aliyetoa ng'ombe, kisha kondoo, kisha kuku, kisha yai. Khatwib akipanda mimbari, Malaika hufunga madaftari na kukaa kusikiliza hotuba.
- Kusoma Surat Al-Kahf: Ni sunnah kusoma sura hii katika usiku wa Ijumaa au mchana wake. Mtume amesema itamulika nuru kwa msomaji kati ya Ijumaa mbili.
- Kuzidisha Swala kwa Mtume: Kumswalia sana Mtume Muhammad (Swallah Llahu 'alayhi wa sallam) usiku na mchana wa Ijumaa, kwani salamu zetu hufikishwa kwake.
- Kusikiliza Khutba kwa Utulivu: Ni haramu kuongea au kufanya jambo lolote linalopoteza utulivu wakati Khatwib anahutubia. Hata kumwambia mwenzako "Nyamaza" wakati wa khutba kunaharibu thawabu za Ijumaa yako.
"Ndugu zangu katika imani, siku ya Ijumaa ni fursa ya kipekee ya kujitathmini kiroho. Tusiifanye kuwa siku ya michezo au kupoteza muda, bali iwe ni siku ya toba, dhikri, na kujisogeza karibu na Allah kwa kutekeleza sunnah zake zote zilizothibiti."
Jifunze Zaidi na AMAN VISSION
Je, ungependa kupata uelewa mpana zaidi wa masuala ya Fiqhi, Aqidah, Hadithi, na Lugha ya Kiarabu ili uweze kutekeleza ibada zako kwa usahihi wa asilimia 100? Mfumo wetu wa elimu wa AMAN VISSION chini ya Mwalimu wa Kiislamu: Aman Ismail Hussein upo wazi kwa ajili yako. Tunatoa mifumo mitatu ya masomo kulingana na nafasi yako:
- Mfumo wa Kambi (Bweni): Unaishi kituoni, malazi na chakula (asubuhi na mchana) ni bure!
- Mfumo wa Day (Kutwa): Unasoma kwenye vituo vyetu (Maswa) kisha unarudi nyumbani.
Usikubali kubaki nyuma katika kujifunza dini yako. Usajili unafanyika kwa urahisi kabisa kupitia WhatsApp.
Comments
Post a Comment
Karibu kutoa maoni yako. Tafadhali andika kwa heshima, maadili na lugha yenye kujenga jamii.